Policia e Kosovës ka arritur në objektin e Kuvendit ku po hetohet, siç po pretendon Lëvizja Vetëvendosje një sulm që ka ndodhur ndaj deputetit të kësaj partie, Gazmend Gjyshinca.

Gjyshinca ka thënë se është sulmuar në korridoret e Kuvendit nga deputetë e LDK-së, Arben Gashi e Kujtim Shala, shkruan Reporteri.

Ai ka thënë se ka pësuar lëndime trupore dhe se aty kanë arritur edhe policia e autoambulanca.

Sipas Gjyshincës policia e Kosovës tashmë ndodhet në zyret e LDK-së dhe po e heton rastin.

Në anën tjetër, Arben Gashi nga LDK ka mohuar të ketë pasur përleshje fizike ndërmjet tij dhe deputetit të VV-së.

“Nuk ka pasur asnjë incident”, ka thënë  shkurt Gashi për mediat.