Deklaratat e fundit të zyrtarëve të Kurtit se Forcat e Sigurisë së Kosovës mund të veprojnë në territorin e gjithë vendit, përfshirë edhe veriun, është një tjetër kërcënim alarmues dhe njoftim ogurzi nga Prishtina me qëllim të dëbimit të serbëve nga vendi i tyre, ka thënë drejtori i Zyrës për Kosovën, Petar Petkoviq.
“Për të gjithë faktorët ndërkombëtarë është e qartë se FSK nuk ka çfarë të kërkojë në veri të Kosovës, por Kurti dhe agjentët e tij padyshim duan të shkelin veçanërisht ato marrëveshje që ruajnë paqen dhe garantojnë sigurinë e serbëve në Kosovë, sepse kështu duan të sillen me njerëzit tanë në Kosovë, veçanërisht me serbët në veri”, ka theksuar Petkoviq në një komunikatë për media.
Petkoviq përkujtoi se në marrëveshjen, të cilën Sekretari i Përgjithshëm i atëhershëm i NATO-s Anders Fogh Rasmunsen e ka nënshkruar dhe garantuar me autoritetet në Prishtinë në vitin 2013, pa mëdyshje thuhet se asnjë formacion ushtarak nga Prishtina nuk mund të veprojë në katër komuna në veri të Kosovës pa miratimin paraprak të komandantit të KFOR-it dhe katër kryetarëve të komunave.
Drejtori i Zyrës për Kosovë shtoi se kjo garanci është nënshkruar dhe miratuar në të njëjtën ditë me Marrëveshjen e Brukselit, gjë që tregon se ky dokument ka qenë edhe kusht për Marrëveshjen e Brukselit.
“Të mos luajnë me zjarrin në Prishtinë dhe të mos përdorin deklarata, njoftime dhe lëvizje nxitëse për të destabilizuar më tej situatën e sigurisë në Kosovë, të cilën tashmë e kanë minuar me lëvizjet e tyre të njëanshme, të paligjshme dhe të dhunshme në lidhje me targat. Beogradi nuk do lejojë askënd që serbët në Kosovë t’i shndërrojë në pëllumba balte dhe do të jetë gjithmonë me popullin e tij, dhe misionet ndërkombëtare duhet të përcaktohen qartë sipas këtij njoftimi të papërgjegjshëm dhe të rrezikshëm nga bashkëpunëtorët e Kurtit që duan vetëm konflikte, tensione dhe kriza të reja”, tha. Petkoviq./FrontOnline/