Në Kosovë gjatë ditëve të fundit është kthyer fluksi i të infektuarve me COVID-19. Një nga qytetet ku po vazhdon të rriten numri i të infektuarve po del të jetë edhe Istogu, shkruan Front Online.

Atje, mbrëmë rezultuan edhe dy raste pozitive me këtë virus, duke e çuar kështu në 14 numrin e të infektuarve në këtë qytet.

Rreth gjendjes së tyre, në një prononcim për “Front Online”, foli drejtori i Shëndetësisë në Istog, Mujë Osmanaj.

Ai tha se gjendja e të infektuarve është stabile, dhe vetëm një po trajtohet QKUK.

“Për momentin në komunën e Istogut janë 14 raste aktive me Coronavirus. Gjendja e tyre ështe e mirë dhe nuk kanë simptome, me përjashtim të njërit që po trajtohetn në Klinikën Infektive në QKUK”, deklaroi Osmanaj.

Si rezultat i kontaktit me të infektuar, në Istog janë izoluar edhe disa familje.

“Në Istog janë edhe pesë familje të izoluara, pasi që të njëjtit kishin kontakte me persona të prekur nga virusi COVID-10”, theksoi ai.

Që nga fillimi I pandemisë, në Kosovë janë infektuar 1.486 persona. Prej të cilëve 403 vetëm në dy javët e fundit./Front Online/