Prindon Sadriu, bashkëshort i ushtrueses së detyrës së presidentes, Vjosa Osmani, i cili është pjesë e stafit diplomatik të Republikës së Kosovës në Shkup, edhe dje ka vazhduar “luftën virtuale” me shefin e tij, Gjergj Dedaj, ambasador në Maqedoninë e Veriut.
Pas publikimit të komunikimit të tyre një ditë më parë në Front Online, Sadriu i ka dërguar dje sërish e-mail ambasadorit Dedaj. Në ri-komunikimin mes tyre, që po ashtu e posedon Front Online, Sadriu i kërkon Dedajt, siç shkruan ai, sqarim për shkelje të rëndë, rrjedhje të komunikimeve të brendshme në publik.
“Nuk i kam faj askujt nëse ndihet në siklet nga kjo papërgjegjësi. Sa i përket punës në Ambasadë, unë merrem maksimalisht me angazhime zyrtare këtu. Përkundër ndrydhjes joligjore që ju i bëni aktivitetit tim në Ambasadë. Unë ende nuk njoftohem nga ju për asnjë zhvillim në Ambasadë”, ka shkruar mes tjerash Sadriu.
Sadriu Dedajt: I paprecedent, mosprocedimi i akreditimit tim 5 mujor nga ju
Sadriu, që si bashkëshort i u.d të presidentes në komunikim me ambasadorin Dedaj i ishte referuar vetes si “Zotëriu i Parë në Detyrë”, ka shtuar se i paprecedent ka qenë edhe mosprocedimi i akreditimit të tij 5 mujor nga ana e Dedajt.
“Çuditërisht edhe atëherë në kohë fushate zgjedhore. Përndryshe, sa i përket angazhimit tim këtu kam marrë vlerësimet më të larta nga MPJD. Jo vetëm tani, por përgjatë 12 viteve shërbim në Ministri. Por, nëse ju doni ta diskutoni angazhimin tim, atëherë këtë duhet ta bëni përmes takimeve tona, jo përmes e-mailave. Ne nuk jemi larg me hapësirë fizike dhe çështjet mund t’i diskutojmë në person. Unë nuk mbajë kapriço gjatë angazhimeve zyrtare. Jam institucionalist dhe jam i prirur të punojë për vendin, jo për tjerët e as për t’u munduar t’i fyej të tjerët përmes pabesive dhe rrjedhës së informacioneve të brendshme në publik”, ka shkruar Sadriu.
Dedajt i kundërpërgjigjet Sadriut: Është koha të merresh me punë më të mençur
Me të njëjtën “kartë” i është kundërpërgjigjur menjëherë edhe ambasadori Dedaj vartësit të tij, Prindon Sadriut.
“Z. Sadriu është koha po deshe me në fund të merresh me një punë konkrete, më të mençur dhe mos krijo situata fiktive dhe spekulative për të mbuluar mospunën tënde në Ambasadën e RKS-së në Shkup. Kam dëshirë ta kurseni emrin tim nga shpifjet, andaj tendencat e juaja për presione janë thjeshtë alibi për huti dhe për mospunën tuaj në misionin e RKS-së në Shkup. Unë vazhdojë të kërkojë nga ju dhe të gjithë diplomatët e RKS-së në misionin në Shkup, mos përfshirje në fushata partiake elektorale dhe paanësi partiake politike për zgjedhjet e 14 shkurtit”, ka shkruar Dedaj në e-mailin që e posedon “Front Online”.
/ Front Online/
Burri i Vjosa Osmanit shpik një funksion të ri zyrtar- “Zotëria i Parë në Detyrë” (Dokument)
Sadriu akuzon Dedajn: Nuk po e shpërndani punën e Presidentes në Maqedoninë e Veriut
