Sekretari i Përgjithshëm i Kombeve të Bashkuara, Antonio Guterres, u bëri thirrje të dielën Azerbajxhanit dhe Armenisë që menjëherë t’i ndërpresin përleshjet në rajonin Nagorno-Karabak.
Duke i dënuar përdorimin e forcës dhe vrasjen e civilëve, Guterres u bëri thirrje të gjitha palëve që menjëherë t’i ndërpresin luftimet, t’i ulin tensionet dhe të kthehen në negociata kuptimplote pa vonesë, tha zëdhënësi i tij përmes një deklarate.
Në këtë deklaratë gjithashtu thuhet se Guterres do të bisedojë përmes telefonit me presidentin azer, Ilham Aliyev, dhe kryeministrin armen, Nikol Pashinyan, shkruan Anadolu, transmeton Gazeta Express.
Thirrje për ndërprerje të menjëhershme të përleshjeve bëri edhe Departamenti i Shtetit i Shteteve të Bashkuara, duke e dënuar ashpër eskalimin e situatës.
“Shtetet e Bashkuara janë të alarmuara nga raportet për veprime të gjera ushtarake përgjatë Vijës së Kontaktit në zonën e konfliktit në Nagorno-Karabak që ka rezultuar me pasoja të konsiderueshme, përfshirë pasojat në civilë. Ne u shprehim ngushëllime familjeve të personave të vrarë dhe të lënduar”, thuhet në deklaratën e Departamentit të Shtetit.
Përleshja e armatosur mes dy vendeve të Kaukazit Jugor shpërtheu gjatë fundjavës, ku deri më tani janë vrarë së paku 24 persona.
Marrëdhëniet mes Armenisë dhe Azerbajxhanit kanë qenë të tensionuara që nga viti 1991, kur ushtria armene e pushtoi rajonin Nagorno-Karabak, i cili nga komuniteti ndërkombëtar njihet si pjesë e territorit të Azerbajxhanit.
