Pandemia e koronavirusit në Europë po hyn në një moment delikat me nisjen e vitit të ri shkollor.
Edhe pse klasat me nxënës deri tani nuk kanë luajtur rol në përhapjen e kovidit, provat e Organizatës Botërore të Shëndetësisë tregojnë se të rinjtë e kalojnë virusin te të tjerët.
Hans Kluge, drejtori rajonal i OBSH-së për Europën, e krahasoi të enjten sëmundjen e kovidit-19 me një tornado që me ftohjen e motit do të godasë moshat më të mëdha.
Prandaj, Kluge rekomandon që para dimrit, më të moshuarit të vaksinohen nga gripi.
“Koronavirusi nuk i vdes të rinjtë, por ai është si një tornado me bishtin e gjatë. Të rinjtë në dimër janë në kontakt më të ngushtë me popullatën e vjetër. Pa bërë parashikime, presim që dikur të shtohen shtrimet në spitale dhe të rritet vdekshmëria e tyre.”
Më shumë se gjysma e shteteve dhe territoreve europiane që bëjnë pjesë në OBSH raportojnë rritje me mbi 10 për qind të rasteve të reja me kovid.
Ndryshe nga fillimi i vitit, organizata thotë se tani komuniteti shkencor ka më shumë njohuri për ta administruar përhapjen e virusit në shoqëri, dëmet e tij në ekonomi dhe sistemin arsimor.
Përgatitjet për vitin e ri shkollor kanë nisur në Europën Qendrore dhe atë Juglindore duke ndërthurur metodat tradicionale të mësimit me ato nëpërmjet internetit.
Shqipëria do i hapë shkollat më 14 shtator, me protokolle sigurie të hartuara nga ekspertët e Ministrisë së Arsimit, me disa turne dhe orare të shkurtuara.
Për shkak të situatës epidemiologjike, rifillimi i vitit shkollor në Maqedoninë e Veriut është shtyrë për në 1 tetor; në Kosovë, autoritetet kanë miratuar nisjen e mësimit me tri faza nga 1 shtatori për parashkollorët deri më 10 shtator për nxënësit e klasave të shtata e sipër.
Në Francë dhe Britani, nga 1 shtatori mësuesit do jenë të detyruar të mbajnë maska në klasa; shkollat në Itali do rihapen më 14 shtator me klasa më të vogla, ndërsa në Gjermani dhe Spanjë, përparësi i është dhënë higjienizimit të shpeshtë të ambienteve dhe distancimit social.
UNICEF-i njoftoi të enjten se 460 milionë apo një e treta e fëmijëve në botë nuk mundën të sigurojnë mësimin nga distanca në muajt e pranverës kur thuajse i gjithë planeti mbylli shkollat prej pandemisë, ndaj agjencia ftoi qeveritë të përshtatin politikat për këtë sfidë të re.
