Organizata Botërore e Shëndetësisë (OBSH) shprehu sot shqetësimin e saj në lidhje me situatën e pandemisë së COVID-19 në Republikën Çeke dhe reduktimin e planifikuar të qeverisë për gjurmimin e kontakteve.

“Nuk ka ndonjë alternativë për të testuar, gjurmuar dhe izoluar, me qëllim mposhtjen e COVID-19, as këtu dhe as diku tjetër”, tha zyra çeke e OBSH-së në një deklaratë të botuar në Facebook.

Reagimi i organizatës shëndetësore të Kombeve të Bashkuara vjen si përgjigje ndaj komenteve të kryeministrit Andrej Babis, i cili sugjeroi gjurmimin e zinxhirëve të infeksionit vetëm në rastet me simptoma të rënda.

“Zyrtarët çekë u ankuan për mungesë stafi, pasi autoritetet u përpoqën të gjurmonin zinxhirët e infeksionit edhe në raste asimptomatike”, reagoi në të përditshmen “Pravo”, kreu i autoriteteve shëndetësore të Pragës, Zdenka Jagrova.

Numrat e infeksioneve në Republikën Çeke kanë arritur nivele rekord në ditët e fundit, me 563 raste të reja të regjistruara në 24 orët e fundit.