Asnjëra nuk janë në fuqi momentalisht.
Por, për aq kohë sa ishin, taksa e reciprociteti, i dhanë efektet e tyre në frenimin e eksportit të Serbisë në Kosovë.
Fqinji verior prej fillimit të 2020-s e deri tani ka eksportuar në Kosovë produkte në vlerë të 54 milionë eurove, raporton Front Online.
Në Doganë thonë se kjo shifër është shumë më e vogël sesa shifra që ishte në periudhën paraprake kur Serbia fuste mallrat e saj në tregun kosovarë pothuajse pa asnjë pengesë.
“Derisa, para taksës e reciprocitetit, rreth 35 milionë ka qenë një muaj, tani jemi në një periudhë mjaft të gjatë dhe i tërë importi ka arritur në 54 milionë. Mund të themi se muaji tani është 1 e 3 e muajit paraprak”, u shpreh Stavileci për Front Online.
Se taksa e reciprociteti, dy masat që Qeveria e Kosovës i vendosi Serbisë si kundërpërgjigje ndaj fushatës që kjo e fundit bënte për ç`njohje të pavarësisë së Kosovës, e dhanë ndikimin e tyre në rënien e importit nga Serbia, e thotë edhe njohësi i ekonomisë, Bardh Ahmeti.
Megjithatë tregu kosovarë mbetet akoma treg i hapur për produktet serbe, për aq kohë sa sipas tij nuk hyjnë në zbatim disa faktorë.
“Vetëm ngritja e cilësisë së produkteve vendore, rritja e vetëdijes së konsumatorëve për konsumin e produkteve vendore, rritja e numrit të prodhuesve vendor dhe fuqizimi i prodhimeve vendore nga shteti, mund ta rrisin konkurrueshmërinë në dëm të produkteve serbe”, tha ai për Front Online.
Të dhënat e Doganës nuk e vendosin më Serbinë në krye të listës së eksportuesëve më të mëdhenj në Kosovë.
Serbia, që para vendosjes se taksës e reciprocitetit eksportonte në Kosovë mbi 450 milionë euro produkte brenda vitit – kryesisht aso që lidheshin me Industrinë Ushqimore, Industrinë e materialit ndërtimor dhe kimikatet e ndryshme, tash ka rënë për disa pozita më poshtë.
/Front Online/
