Zyra Kombëtare e Auditimit(ZKA) ka gjetur një mal shkeljesh në pasqyrat financiare vjetore të Ndërmarrjes Publike Lokale “Stacioni i Autobusëve” në Prishtinë, kryesisht me menyrën e punësimeve dhe avansimin e stafit në ndërmarrje, raporton portali “Front Online”.
Sipas Auditorit, ndërmarrja publike lokale kishte avancuar punonjësin nga pozita e vozitësit në pozitën e punonjësit të logjistikës me vendim të Kryeshefit Ekzekutiv, duke anashkaluar procedurat e brendshme të shpalljes së konkursit për avancim në pozitë.
“Avancimi i punonjësit në pozitë pune pa ndjekur procesin e rregullt të avancimit ka ndodhur si rrjedhojë e mos-përfilljes së procedurave ligjore nga menaxhmenti i ndërmarrjes”, thuhet në raportin e Auditorit.
Poashtu, sipas këtij të fundit, Stacioni i Autobusëve gjatë vitit 2019 kishte angazhuar 4 punëtorë me kontrata mbi vepër për punë dhe detyra specifike dhe me kohëzgjatje të caktuar në pozitat: 1 (një) zyrtar konsulent ligjor, 1 (një) zyrtar konsulent për financa, 1 (një) zyrtarë për mbarëvajtjen e procesit të programit të punës si dhe 1 (një) zyrtarë për financa, kontabilitet dhe këshillime tatimore.
Për të gjitha këto angazhime, Stacioni i Autobusëve nuk ka shpallur konkurs publik. Kjo ka ndodhur për shkak që menaxhmenti kishte shmangur kërkesat ligjore, duke favorizuar kandidatët të cilët janë shpërblyer me këto kontrata, thuhet mes tjerash në raportin e Auditorit.
/Front Online/
