As për ditë e as për javë.

Hashim Thaçi, më 2016, si President preferonte të fliste për “dakikat” e fundit lidhur me ndodhjen e liberalizimit të vizave.

“Procesi për liberalizimin e vizave më nuk është duke i numëruar javët apo ditët, por tani është duke i numëruar orët”,kishte thënë ai para mediave.

Dy vjet më vonë, më 2018, Ramush Haradinaj, në rolin e kryeministrit, i ra edhe më trup.

“Liberalizimi ka ndodh pardje”, thoshte atë kohë Haradinaj.

Por në Bashkimin Evropian po presin më pak llafe si këto e më shumë punë në përmbushjen e standardeve që janë vënë si kusht për procesin në fjalë.

Këta ia konfirmoi portalit një burim diplomatik brenda Unionit, i cili tha se Franca dhe Holanda janë dy nga nga një numër shtetesh anëtare që mendojnë kështu.

Por cilat janë realisht ato?

“Vazhdon të jetë mungesa e stabilitetit politik dhe në mënyrë të veçantë fuqizimi i sundimit të ligjit, që sipas këtyre dy vendeve do ta vulosnin një proces pozitiv”, u shpreh për Front Online njohësi i integrimeve, Emrush Ujkani.

Dy prej fuqive më të mëdha të Unionit nuk janë bindur as pas rekomandimit pozitiv të Parlamentit dhe Komisionit Evropian që kosovarët të lëvizin lirshëm në zonën Schengen.

Njohësi i Integrimeve Evropiane, Emrush Ujkani, vlerëson se kjo është e padrejtë.

“Edhe pse kemi pasur probleme të brendshme politike dhe vazhdojmë të kemi edhe më tutje, një pjesë të madhe të saj, Kosova, bukur mirë i ka plotësuar kriteret”, tha ai për Front Online.

Kosova, kësisoji, po hyn në dekadën e tretë pa liberalizim të vizave.
Madje edhe Gjermania, që është vendi më i fuqishëm në Evropë dhe që mbështet liberalizimin, nuk mori asnjë hapë që ta shtyjë përpara këtë çështje gjatë presidencës së saj 6 mujore në bllok e cila përfundon në fund të dhjetorit.