Me rritjen e rasteve me Coronavirus në Kosovë, është shtuar edhe numri i vdekjeve. Aktualisht në Kosovë janë shënuar 82 raste të vdekjes të personave që përveç Coronavirusit thuhet se kishin edhe sëmundje të tjera shoqëruese, raporton Front Online.

Të paktën kështu është bërë e ditur nga përditësimi i të dhënave nga IKSHPK-ja, dhe nga konstatimet e mjekëve të Klinikave në të cilat janë duke u trajtuar të prekurit me virusin Covid-19.

Edhe pse në fillim të raportimit të rasteve të vdekjes nga institucionet shëndetësore në vend, janë dhënë detaje mbi identitetin e viktimave, tashmë një gjë e tillë nuk po bëhet.

Nga e shtuna kur për një ditë vdiqën 9 persona, e ku 5 prej tyre dyshohet se vdekjen e gjetën pas problemit me oksigjen, nga institucionet shëndetësore, nuk është duke u dhënë asnjë detaj mbi identitetin e viktimave.

Front Online ka pyetur në Ministrinë e Shëndetësisë dhe në QKUK, se pse nuk janë duke u dhënë detaje mbi identitetin e viktimave nga Coronavirusi. Të dy palët kanë thënë që për këtë gjë përgjegjës është Instituti Kombëtarë i Shëndetësisë Publike.

“Të gjitha rastet i raportohen IKSHPK-së dhe ato përfshihen në raportin 24 orësh. Familjaret informohen, komunat prej nga vijnë ata gjithashtu dhe kujtdo qe i intereson: inicialet, mosha, vendbanimi dhe a ka pasur sëmundje te tjera shoqëruese përveç Covid-19, mund të informohet”, është bërë e ditur në përgjigjen e Zyrës për Informim në Ministrinë e Shëndetësisë, për Front Online.

Në ndërkohë nga QKUK-ja, kanë thënë që publikimin e rasteve e bën vetëm IKSHPK-ja, pa dhënë detaje më shumë.
Front Online gjatë ditës ka tentuar të marrë një deklaratë edhe nga IKSHPK-ja, por të njëjtit nuk kanë qenë të interesuar që të deklarohen për mediumin tonë. /Front Online/

Vdekjet nga Coronavirusi mbahen sekrete, VV-ja i lyp përgjegjësi ministrit Zemaj