Ministria e Punëve të Jashtme e Republikës së Kosovës ka lëshuar një komunikatë me rastin e 26-vjetorit të ndërhyrjes së NATO-s në Kosovë. Në këtë ditë të rëndësishme, MPJD riafirmon mirënjohjen e thellë ndaj aleatëve të NATO-s dhe Shteteve të Bashkuara, për mbështetjen e dhënë në ndaljen e gjenocidit dhe spastrimit etnik që po ushtrohej nga regjimi i Sllobodan Millosheviqit ndaj popullatës shqiptare të Kosovës.

Komunikata thekson se, pavarësisht ndërhyrjes që ndaloi makinerinë kriminale të Serbisë, forcat serbe vazhduan të kryenin masakra dhe krime kundër civilëve, duke shkaktuar vdekjen e mbi 10,000 shqiptarëve dhe dëbimin e mbi një milion të tjerëve. Kosova sot kujton masakrat në Reçak, Meje, Izbicë, Suharekë dhe shumë të tjera, të cilat mbeten plagë të thella në kujtesën kolektive të popullit të Kosovës.

Në këtë komunikatë, MPJD gjithashtu kritikon vazhdimin e mohimit nga ana e Serbisë për krimet e luftës të kryera nga forcat serbe dhe refuzimin e saj për të kërkuar falje ose për të ndjekur penalisht kriminelët e luftës. Kosova thekson se Serbia ende nuk ka pranuar përgjegjësinë për krimet që ndodhën dhe se nuk ka hapur arkivat e nevojshme për të zbardhur të vërtetën.

Për më tepër, komunikata e MPJD-së thekson se Kosova ka ndërtuar një shoqëri të lirë dhe demokratike, duke mbrojtur të drejtat e të gjitha komuniteteve, përfshirë serbët, dhe se do të vazhdojë të qëndrojë vigjilente përballë përpjekjeve të Serbisë për të destabilizuar rajonin.

Në fund të komunikatës, MPJD riafirmon angazhimin e Kosovës për vlerat e drejtësisë, së vërtetës dhe demokracisë dhe për ruajtjen e stabilitetit dhe paqes në rajon, duke mbështetur gjithmonë aleatët ndërkombëtarë të Kosovës.