Problemi i pasaportave është zgjidhur më në fund.

Kosovarët po e marrin këtë dokument pa problem që nga fillimi i marsit.

Kjo është konfirmuar për Front Online nga Ministria e Punëve të Brendshme.

“MPB është furnizuar me material për dokumente personale të identifikimit”, thuhet në përgjigjen e këtij dikasteri për “Front Online”.

Furnizimi vjen pas një kohe të gjatë qëkur qytetarët nuk po mund të nxirrnin pasaporta.

Kontrata për furnizim është nënshkruar në dhjetor, ka vlerë 4 milionë e 21 mijë e 180 euro dhe i është dhënë kompanisë gjermane “Veridos GmbH”.

Kohëzgjatja e kësaj kontrate është për 12 muaj dhe parasheh furnizimin me dokumente blanko, si pasaporta, letërnjoftime dhe patentë shoferë.

Saktësisht, parashihet furnizimi me 290 mijë pasaporta të zakonshme, 270 mijë e 208 letërnjoftime elektronike TIP A, 7 mijë leje qëndrim TIP C, 125 mijë patentë shoferë dhe mirëmbajtja e sistemeve për 12 muaj.

“Aktualisht kemi material të mjaftueshëm për dokumente”, thanë nga MPB-ja për Front Online.

Tutje nga Ministria, e cila udhëhiqet nga Xhelal Sveçla, ka thënë se punojnë që të shkurtojnë pritjet e qytetarëve për dokumente.

“Pajisja e qytetarëve me dokumente personale është duke vazhduar dhe MPB po punon me kapacitete të plota që sa më shpejtë të jetë e mundur të përfundojnë të gjitha pritjet e qytetarëve”./Front Online/