Edon Zhegrova ishte mbrëmë protagonist në fitoren e Lillet ndaj Atletico Madridit me rezultat 3:1.

Ylli kosovar e shënoi njërin prej tre golave të ekipit francez në ndeshjen e vlefshme për xhiron e tretë të fazës së ligës në Ligën e Kampionëve.

E pas lojës, prishtinasi u pa në dhomën e zhveshjes me një plis me shqiponjë dhe me një flamur kombëtar shqiptar.

Madje, edhe bashkëlojtarët e tij e bënë shqiponjën dykrenore me duar.

Por, si erdhi Zhegrova deri tek plisi dhe tek flamuri kombëtar.

Në një video që po qarkullon në rrjetet sociale, 25 vjeçari shihet pas lojës duke shkuar në drejtim të tribunës ku e priste një tifoz i ri shqiptar.

E ky i fundit ia dorëzoi ish-futbollistit të Baselit një plis, të cilin e vendosi menjëherë në kohë futbollisti kosovar, por edhe flamurin kombëtar, të cilin e mori me vete futbollisti, i cili në këmbim tifozit të vogël shqiptar ia dhuroi fanellën e tij. /Gazeta Express/