Ambasada e Kosovës në Emiratet e Bashkuara ka njoftuar se 66 kosovarë do të kthehen në Kosovë, më datën 21 maj.
Ambasada e Kosovës në Abu Dhabi bën të ditur se Ministria e Punëve të Jashtme dhe Diasporës në bashkëpunim me dikasteret tjera, kanë aprovuar kërkesën e tyre për transfer përmes bashkëpunimit me Ambasadën e Shqipërisë.
LEXO EDHE: 66 kosovarë kërkojnë urgjentisht të kthehen nga Dubai
“Konkretisht, me datën 21 Maj Qeveria e Shqipërisë ka aranzhuar aeroplan të Fly Dubait për transferin e 80 qytetarëve të Republikës së Shqipërisë. Neve Qeveria shqiptare dhe Fly Dubai na kanë ofruar mundësinë që gjithë qytetarët e Kosovës të përfshihen në këtë udhëtim dhe Fly Dubai e ka hap sportelin për shitjen e biletave. Të gjithë 66 qytetarët (edhe të tjerë nëse s’janë lajmëruar por që janë urgjente) që kanë kërkuar të transferohen luten që të përgatiten dhe të organizohen për fluturim Dubai-Tiranë”, thuhet në njoftim.
Tutje ambasada ka treguar se ku mund të informohen qytetarët për fluturimin.
“Mbi detajet e fluturimit ju lutem të vizitoni faqen zyrtare FlyDubai.com dhe momentin që do të blini biletën, duhet të dërgoni me email pranë Ambasadës së Kosovës në Abu Dhabi, detajet tuaja si dhe kopjen e biletës, me qëllim ndarjen e listës së udhëtarëve me autoritetet në Shqipëri dhe Ambasadën tonë në Tiranë e cila do të organizojë transferin pastaj për në Kosovë. Adresa e emailit është: [email protected]”, vijon njoftimi.
Ndryshe, çdo qytetarë që kthehet në Kosovë është i detyruar të qëndrojë në Qendrën Studentore e cila është shndërruar në karantinë për shtatë ditë, ku më pas do të testohen për të kuptuar nëse janë prekur nga virusi COVID-19.
