Kryetari i Komunës së Drenasit, Ramiz Lladrovci, ka folur rreth asaj se a duhet të jap dorëheqje presidenti i vendit, Hashim Thaçi, nëse i konfirmohet aktakuza e ngritur nga Prokuroria e Specializuar e Hagës.

Lladrovci i cili vjen nga radhët e PDK-së në Rubikon me Adriatik Kelmendin ka deklaurar se për këtë duhet të vendos vet presidenti dhe se ai e mbështet çdo vendim të tij.

“Dua të bëjë të ditur se Presidentin Hashim Thaçi dhe kryetarin e PDK-së, Kadri Veseli, i kam miq, i kam shokë prej kohësh së ilegalitetit prej viteve të studimeve kemi vepruar, punuar dhe kemi organizuar e kemi themeluar UÇK-në bashkë me shumë shokë dhe miq”.

“A do të mbetet presidenti në postin e tij nëse ka aktakuzë të konfirmuar do të vendos ai vet, nuk e di a duhet të vazhdojë të jetë president. Nuk e besoj që presidenti në qoftë se i ngritet aktakuzë edhe sipas deklaratave të tij, nuk do të vazhdojë të jetë president, do të jap të dorëheqje”.

“Ndërsa kryetari i PDK-së, nuk e besoj se duhet të jap dorëheqje nga pozita e tij besoj se kjo nuk e pengon në rast se konfirmohet aktakuza”.

Lladrovci theksoi se PDK nuk duhet të futet në koalicion për bashkëqeverisje me LDK-në, AAK-në dhe Nismën.

“Unë sa i përket asaj se a duhet PDK të futet në qeverisje jam deklaruar edhe para disa dite. Unë jam kundra përfshirjes, dikush mundet të më marrë për inat sepse ndoshta synon të bëhet ministër dhe zëvendësministër por jam kundër me hy PDK në bashkëqeverisjen të qeverisë së tashme”.

“Unë jam që të mbështetet dhe të përkrahet kjo qeveri në çdo vendim të rëndësishëm për Kosovën, kam bërë thirrje me i mbështet proceset shumë herë dhe do të jem prap”.

”Por PDK duke u futur në qeverisje ne do të zvogëlohemi si parti sepse reagimet e njerëzve të qenurit gjatë në pushtet i bënë njerëzit me u mërzit prej teje”.

“PDK është në opozitë dhe mund ta mbështet qeverinë në të gjitha proceset. Unë jam kundër përfshirjes së PDK-së në qeveri, duhet të jetë në opozitë. Sepse LVV nuk është ndonjë farë opozite”, ka thënë Lladrovci.