Ushtruesja e detyrës së shefes së Grupit Parlamentar të Lëvizjes Vetëvendosje, Mimoza Kusari-Lila ka deklaruar se beson që sot do të kryhet çështja e zgjedhjes së presidentit të ri të vendit.
Kusari-Lila tha se gjatë ditës së sotme janë angazhuar për të siguruar votën e 80-të për presidentin e ri të Kosovës.
“Unë besoj se i kemi 80-të votat e mjaftueshme. Jemi angazhuar për t’i siguruar këto vota, por kjo mbetet të konfirmohet sot në seancën e thirrur për të votuar presidentin”, shtoi Kusar-Lila për Indeksonline.
E njëjta nuk ka pranuar të deklarohet lidhur me raportimin se deputeti i 80-të që ka siguruar votën për votimin e presidentit është Adem Hoxha nga Partia Unike e Goranëve.
Duhet shtuar se nga Lëvizja Vetëvendosje u kanë bërë thirrje të gjithë deputetëve që të jenë të pranishëm në këtë seancë, duke ua përkujtuar se e kanë obligim në bazë të zgjedhjes së tyre si deputetë të Kuvendit të Kosovës.
Pavarësisht kësaj nga PDK dhe AAK kanë deklaruar hapur se nuk do të jenë prezent në këtë seancë, e cila filloi dje por u ndërpre për shkak të numrit jo të mjaftueshëm në votim.
Ndryshe mbrëmë raundi i parë i votimit u përsërit dy herë, pasi në votim nuk morën pjesë 80 deputetë apo dy e treta e deputetëve, numër ky i nevojshëm për t’u konsideruar i konsumuar raundi i parë i votimit.
Në këto dy votime morën pjesë 78, përkatësisht 79 deputetë.
Sipas Kushtetutës, në rrethin e parë të votimit duhet që të paktën 80 deputetë të marrin pjesë në votim, në të kundërtën votimi përsëritet.
I njëjti rregull për pjesëmarrjen e 80 deputetëve vlen edhe për raundin e dytë të votimit.