Kryeministri i Kosovës, Albin Kurti ka reaguar edhe njëherë lidhur me Ligjin për Zgjedhjet.

Ai, përmes një postimi në profilin e tij në Facebook, ka shkruar se mbrëmë ka fituar opozita e sot duhet ët fitojë shteti.

Ai ka thënë që Ligji për Zgjedhjet nuk është aktual dhe se pas zgjedhjes së presidentes do të punojnë me opozitën për të përmbyllur reformën zgjedhore këtë vit.

Postimi i tij i plotë:

Mbrëmë fitoi opozita, sonte duhet të fitojë shteti. Zgjedhja e Presidentes së Republikës është fitore për Kosovën. Ajo nuk është kundër askujt dhe është për të gjithë. Me zgjedhjen e Presidentes përmbyllet hapi i tretë i konstituimit të institucioneve të legjislaturës së tetë.

Pas fitores me 50,28% të votave në zgjedhjet e 14 shkurtit, ne jemi shumica në Kuvendin e Kosovës. Mbrëmë deputetët tanë ishin shumica, por nuk ishin 2/3 e të pranishmëve. Nuk arritëm të procedojmë me projektligjin që ua mundëson mërgatës të votojë në ambasadat e konsullatat tona.

Ky Projektligj nuk kishte të bënte me reformën zgjedhore. Sidoqoftë, ai sot nuk është aktual. Sot kemi seancën për zgjedhjen Presidente të znj. Vjosa Osmani. Menjëherë pas kësaj formojmë komisionin ku bashkë me opozitën punojmë, pajtohemi dhe sivjet e përmbyllim reformën zgjedhore./Front Online/