Ambasadorja gjermane në Serbi, Anke Konrad, në një intervistë për mediat serbe deklaroi se është shumë e rëndësishme që të gjitha marrëveshjet ndërmjet Kosovës dhe Serbisë të zbatohen dhe shton se pret që sot në Bruksel të merren “vendime të mira”, veçanërisht ato që kanë të bëjnë me dinarin në mënyrë që “njerëzit mund të jetojnë jetën e tyre”, transmeton FrontOnline.

Ajo thekson se është shumë e rëndësishme që marrëveshjet të zbatohen.

“Kjo vlen për Brukselin e vitit 2013 dhe për marrëveshjet që janë lidhur më pas, dhe sigurisht për vendimet e marra në Bruksel gati një vit më parë, si dhe për ato në Ohër”, thotë Konrad.

Sipas saj, kjo është e rëndësishme për të gjithë në Kosovë dhe Serbi, dhe tani veçanërisht për ata që jetojnë në Veri të Kosovës, sepse siç thekson ajo, normalizimi i marrëdhënieve jo vetëm që do t’ua lehtësojë jetën shumë njerëzve në rajon por gjithashtu do të kontribuojë në çdo zhvillim të ardhshëm.

“Ne shohim se tensionet e vazhdueshme nuk janë të mira për asnjë palë, veçanërisht jo për njerëzit që jetojnë atje, duhet të ketë pasoja për moszbatimin e marrëveshjeve dhe mendoj se duhet të jenë në qendër të vëmendjes, ata që marrin vendime politike në progres në zbatimin e marrëveshjeve”, deklaroi Konrad./FrontOnline/