Komisioni për Ekonomi, Punësim, Tregti, Industri, Ndërmarrësi dhe Investime Strategjike, kryesuar nga Endrit Shala, kryetar, shqyrtoi dhe miratoi sot dy raporte të vitit 2019, atë të Komisionit të Pavarur për Miniera dhe Minerale, si dhe raportin e Autoritetit Rregullator për Shërbimet e Ujit.

Musa Shabani, drejtor i Komisionit të Pavarur për Miniera dhe Minerale, paraqiti para anëtarëve raportin, duke përmendur, ndër të tjera, edhe sfidat me të cilat është përballur kompania të cilën ai e udhëheq.

“Mos trajtimi në kohë i lëndëve nga gjykata, po ashtu është një sfidë me të cilën ne si kompani përballemi”, ka shtuar Shabani.

Në anën tjetër, raportin e Autoritetit Rregullator për Shërbimet e Ujit, para komisionit e paraqiti drejtori Raif Preteni, i cili tregoi për punën e ARRU-së gjatë vitit të kaluar. Ai tha se ky institucion ka kryer detyrat e tij, duke përfshirë këtu edhe punën në terren.

Deputetët, pas kërkesë së Kryesisë, gjithashtu kanë votuar formimin e grupit të punës për zgjedhjen e Bordit të NP KOSTT, i cili do të filloi me takimet që nga nesër.