Ndërsa shumë njerëz përjetojnë dhimbje në këmbë kur ecin, ata zakonisht ia atribuojnë atë plakjes ose lodhjes. Megjithatë, mund të jetë një shenjë e diçkaje shumë më serioze, paralajmëroi profesori britanik.

Nëse ju dhembin këmbët gjatë ecjes, mund të vuani nga sëmundja e arterieve periferike, e quajtur edhe sëmundje vaskulare periferike.

Kjo është një gjendje e zakonshme e zemrës ku grumbullimi i depozitave yndyrore në arterie kufizon rrjedhjen e gjakut në muskujt e këmbëve – duke i shkaktuar të sëmurët të ndjejnë dhimbje. Këto copa yndyre gjithashtu mund të bllokojnë rrjedhjen e gjakut në tru, gjë që mund të çojë në sulme fatale në zemër dhe goditje në tru.

Hulumtimet kanë treguar se një në pesë persona me këtë diagnozë, nëse nuk diagnostikohet dhe trajtohet, do të përjetojë një atak në zemër, goditje në tru ose vdekje brenda pesë viteve.

Profesor David Newby, nga Fondacioni Britanik i Zemrës, shpjegoi se si ndihet zakonisht dhimbja e këmbës e lidhur me këtë gjendje. “Nëse përjetoni ngërçe në këmbë gjatë ecjes, mund të jetë një ide e mirë të vizitoni mjekun tuaj, pasi kjo mund të jetë një simptomë e sëmundjes vaskulare periferike. Është më e zakonshme tek duhanpirësit dhe njerëzit që kanë diabet.”

Për të trajtuar këtë gjendje, mjekët rekomandojnë një ndryshim në stilin e jetës. Këto përfshijnë ushtrimin e rregullt, shmangien e duhanit dhe ngrënjen e një diete të pasur me fruta, perime, yndyrna të shëndetshme dhe drithëra.

Duhet të trajtohen gjithashtu shkaqet themelore, duke përfshirë presionin e lartë të gjakut, kolesterolin e lartë dhe diabetin.

Mjekët gjithashtu mund të përshkruajnë ilaçe për të reduktuar simptomat e sëmundjes – duke përfshirë statinat që mund të parandalojnë formimin e depozitave të yndyrës./FrontOnline/