Inspektorati Policor i Kosovës njofton se kanë arrestuar një zyrtar policor me dyshimin se ka kryer veprën penale “dhunë në familje”.

“IPK kishte pranuar informacione dje në orët e pasdites nga Policia e Kosovës lidhur me dyshimin së një zyrtar policor në Istog ka kryer veprën penale të dhunës në familje”.

“Menjëherë pas pranimit të informacionit, hetuesit e IPK-së i janë përgjigjur thirrjes duke intervistuar të dyshuarin (zyrtarin policor) si dhe viktimën e këtij rasti – bashkëshorten e tij, të cilës i është ofruar edhe ndihma mjekësore”, thuhet në njoftimin e IPK-së.

Bëhet e ditur se pas disa veprimeve fillestare hetimore është konsultuar edhe prokurori kompetent dhe zyrtarit policor me vendim të prokurorit i është caktuar masa e ndalimit për 48 orë dhe është suspenduar nga puna.

Hetuesit e IPK-së raportojnë se në koordinim të plotë me Prokurorinë do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast.