SPAK deklaroi se biznesmeni dhe pronari i televizioneve Ora News dhe Channel One është subjekt i Ligjit Antimafia, për shkak të precedentëve penalë në trafikun e drogës në Turqi dhe Itali, ndërsa avokatët e tij pretenduan se pasuritë janë të ligjshme dhe e konsideruan vendimin “një sulm politik”.

Përmes një njoftimi për shtyp, SPAK deklaroi se Ylli Ndroqi alias Xhemail Pasmaçiu është subjekt i Ligjit Antimafia dhe se “perandoria” e biznesit të tij dyshohet se i ka rrënjët tek përfshirja në të shkuarën në trafikun e drogës në Shqipëri, Turqi dhe Itali. “Ekzistojnë prova konkrete se [pasuritë ] janë të pajustifikuara. Duke u krahasuar vlera e tyre me të ardhurat e fituara në rrugë të ligjshme, rezulton se vlera e tyre nuk iu përgjigjet dukshëm nivelit të të ardhurave dhe të fitimeve të realizuara në rrugë të ligjshme”, thuhet në njoftimin e SPAK-ut.

Avokatët e Ylli Ndroqit paralajmëruan apelimin e vendimit, ndërsa e konsideruan vendimin e sekuestrimit “një sulm politik” gjatë një prononcimi për mediat. Avokatët e zotit Ndroqi shprehen të bindur se në shkallët më të larta gjyqësore do të vërtetohet që pasuria e zotit Ndroqi është vënë në mënyrë ligjore dhe jo siç pretendon SPAK.

Ndërkohë një nismë e tillë merret në kohën kur presidenti i “Yldon Media Group” ndodhet në gjyq me kryetarin e bashkisë Erion Veliaj. Avokatët e quajnë presion politik vendosjen e sekuestrimit dhe mohojnë që zoti Ndroqi është shoqëruar në polici, pasi ndaj tij nuk ka asnjë urdhërarrest apo ndalim.Koha.Ditore.