Trajneri i Kosovës, Alain Giresse, është rrëfyer në një intervistë ekskluzive për portalin FrontOnline. Në mes të tjerash ai ka folur për jetën në Kosovë, për përshtypjet që ia ka lënë vendi ynë, për ndeshjet e zhvilluara gjatë vitit 2022, si dhe për ardhjet e reja te Kosova
Ndonëse nuk ia doli ta kualifikojë Përfaqësuesen e Kosovës në Ligën B të Ligës së Kombeve me kundërshtarë si Greqia, Irlanda e Veriut dhe Qipro, përzgjedhësi Alain Giresse është njëri prej njerëzve më të vlerësuar në vendin tonë. Shpresat për kualifikim të Përfaqësueses së Kosovës në Kampionatin Evropian “Euro 2024” vazhdojnë me ndeshjet e ciklit eliminator të vitit të ardhshëm, ku “Dardanët” kanë punë me Zvicrën, Bjellorusinë, Rumaninë, Andorrën dhe Izraelin.
Trajneri nga Franca, i cili ka drejtuar edhe Senegalin, Tunizinë, Malin, Gabonin, disa skuadra në Francë dhe tani Kosovën, është rrëfyer në një intervistë të gjatë për portalin FrontOnline, në të cilën ai flet për jetën dhe për përshtypjet që ia ka lënë Kosova, për ardhjet e reja te Përfaqësuesja e Kosovës, si dhe për pritjet nga viti 2023.
Giresse në mes të tjerash ka folur edhe për formën e skuadrës dhe disa rezultate të këtij viti.
“Duhet të kishim vetëm një humbje, atë nga Greqia. Për ndeshjet e nëntorit, plani ishte të zbulonim futbollistë të rinjë, rezultatet s’ishin në plan të parë”, ka thënë Giresse, duke vazhduar:
“Duhet të vazhdojmë të afirmojmë identitetin e përfaqësueses, në lojën e saj, gjendjen emocionale dhe në angazhimin e saj për të mbajtur fanellën e Kosovës”.
Tutje, ai tregon se do të ketë edhe ardhje të reja.
“Nuk është vendosur ende grupi i futbollistëve për vitin 2023, do të ketë ardhje gradualisht”, deklaroi francezi për FrontOnline./FrontOnline/
