Rreth 60 punëtorë të kompleksit gjigant “Grand BlueFafa” nga Shqipëria këto ditë do të qëndrojnë në Kosovë për t’i vizituar disa nga bukuritë natyrore të Kosovës.
Ardhja e tyre është duke i paraprirë fushatës “Pusho Shqip”, ndërmjet të dyja vendeve, Kosovës dhe Shqipërisë e cila është prezantuar ditë më parë nga ministri i Turizmit të Shqipërisë, Blendi Klosi.
Vizitën e tyre në Kosovë e mundësoi kompania turistike “Sharr Travel” në krye me Ruzhdi Kurtishajn.
Ai tha se do të vazhdojnë edhe në të ardhme të kontribuojnë në nxitjen e turizmit ndërmjet të dyja vendeve.
“Është nder i veçantë që na e ka bërë Ambasadori Minxhozi me prezencën e tij, por sigurisht ndihem shumë i lumtur që pas një situate shumë të rëndë që patëm dhe kemi me pandeminë e Coronavirusit, sot për herë të parë po bëjmë edhe pritjen e grupit të parë të kompleksit “Fafa” në Prishtinë në shenjë falënderimi që ju po e bëni për vëllezërit nga Kosova gjatë gjithë sezonit veror”, tha Kurtishaj.
Ambasadori i Shqipërisë në Kosovë, Qemal Minxhozi, duke iu uruar mirëseardhje turistëve nga Shqipëria, kërkoi nga kompanitë turistike që të organizojnë sa më shumë vizita të tilla në mënyrë që të rritet bashkëpunimi ndërmjet të dyja vendeve në fushën e turizmit.
“Shpresoj që grupi si ky i sotmi të vinë sa më tepër në Prishtinë ta vizitojnë Kosovën në mënyrë që ky bashkëpunim që ka filluar tashmë i suksesshëm të thellohet edhe mëtej në të ardhmen, jam shumë i bindur se në Kosovë nuk ka det, por ka një det mirësie dashurie për ju që iu keni shërbyer vëllezërve tuaj nga Kosova. Këtu do ta gjeni të njëjtën dashuri. Unë bëjë apel që edhe kompanitë tjera turistike nga Shqipëria të organizojnë grupe turistike për të vizituar këtë vjeshtë të bukur edhe Prishtinën dhe gjithë Kosovën”, tha Minxhozi.
E Albulen Ndrepepaj, menaxher i Hotelit “Fafa”, tha se është hera e parë që i viziton bukuritë natyrore të Kosovës.
Ai tha se Kosova është një ndër vendet që duhet të vizitohet për bukuritë natyrore që ka.
“Është hera e parë që vi në Kosovë dhe në Prizren ishte ndalesa jonë e parë, ishte një ambienti i bukur fantastik me një histori të rrallë, duke vazhduar me vizitat tjera dhe vendet historike që i ka Prizreni. Është një ndër vendet që duhet të vizitohet patjetër sidomos për bukuritë natyrore që të ofron Kosova si Brezovica e vendet tjera”, tha ai.
