Çmimet po shkojnë lart e më lart.

Inflacioni në nëntor të këtij viti ishte për 6.9% më i madh krahasuar me muajin e njëjtë të vitit paraprak, 2020.

E gjitha kjo erdhi si rezultat i shtrenjtimit të shumicës së produkteve, shkruan “Front Online”.

Buka e drithërat u shtrenjtuan për 7.3 %, qumështi, djathi dhe vezët për 4.0%.

Perimet për 1.1%, sheqeri, reçeli, mjalti, çokollata dhe ëmbëlsira për 4.2%.

Rritje pati edhe te vajrat dhe yndyrat ushqimore, 3.8%.

Ngritja e çmimeve, sipas Selatin Kaçanikut nga organizata “Konsumatori”, ka varfëruar shportën e konsumatorit.

“Shtresa e varfër tashmë është falimentuar shkaku i ngritjes së çmimeve. Kur flasim për ngritjen e çmimeve një gjë duhet ta kemi të qartë, ne si qytetarë jo vetëm që kemi ngritje të çmimeve, por edhe manipulim të afateve të skandencës, të peshës së produkteve etj”, u shpreh Kaçaniku për “Front Online”

Ato nuk do të stabilizohen deri kah mesi i vitit të ardhshëm 2022.

Ekonomisti Erton Bega thotë se kjo do të ndodh kur të rregullohen disa faktorë që derivojnë nga tregu global e të cilët në fakt ishin edhe ata që e shkaktuan inflacionin në Kosovë.

“Inflacioni është i importuar. Rritja e kërkesës për mallra i ka zënë të papritur prodhuesit globalë. Kërkesa e ka kaluar ofertën dhe për rrjedhojë çmimet janë rrit. Ky është faktori i parë. Faktori i dytë është presioni që po vjen nga kriza energjetike në tregun global”, theksoi ai për “Front Online”.

Çmimet e nëntorit 2021 krahasuar me ato të tetorit 2021 u rritën për 1,2%.

Si për mësysh, pos pemët u liruan për -5.9% në dallimin midis këtyre dy muajve.