Një grup i madh i mbështetësve të Presidentit amerikan Donald Trump u përleshën me protestuesit e ”Black Lives Matter” në Portland dhe si pasoje një person ka mbetur i vdekur nga të shtënat me armë zjarri.

Nuk dihet saktësisht nëse të shtënat ishin të lidhura drejtpërdrejt me përleshjet që shpërthyen në një zonë në qendër të qytetit, shkruan BBC, transmeton Klan Kosova.

“Oficerët e Policisë së Portland dëgjuan të shtëna me armë nga zona e Southeast 3rd Avenue dhe Southwest Alder Street. Ata u përgjigjën dhe gjetën një person të plagosur. Mjekët u përgjigjën dhe konstatuan se viktima kishte vdekur “, ka deklaruar policia e Portland përmes një komunikate.

Protesta ishte tensionuar si pasojë e një autokolone prej rreth 600 automjetesh që valëvisnin flamuj dhe mbanin rreth 1.000 mbështetës të Trump.

Ata u mblodhën në një qendër tregtare në periferinë e Qarkut Clackama para se të hynin në qendër të Portland.

“Pas vrasjes së afrikano-amerikanit George Floyd në Minneapolis më 25 maj, në këtë qytet janë zhvilluar protesta kundër brutalitetit të policisë dhe racizmit, ngjarje këto që ndezën një valë zemërimi kombëtar dhe ndërkombëtar”.