Reduktimet me rrymë janë kthyer në Kosovë pas gati një dekade.

Të enjten është paralajmëruar ndërprerja e saj për dy orë nëpër të gjitha distriktet, veçse jo në të njëjtën kohë.

Megjithatë e sigurt është se mungesa e energjisë do t`i prek krejt konsumatorët, përjashto ata emergjentë.

Për këtë telashe po ankohen bizneset vendore, të cilat thonë se do të dëmtohen jo pak.

“Kjo e bën shumë më të vështirë operimin e kompanisë. Rritet kostoja sepse detyrohemi me i aktivizu gjeneratorët. Kjo pajisje nuk e jep rrymën sikurse rrjeti elektrik. Kjo na shkakton avari. Riparimi i tyre ka kosto dhe merr kohë”, u shpreh pronari i Golden Eagle, Shaqir Palushi për “Front Online”.

Ankesa ka edhe afaristi tjetër, Ramiz Gashi.

“Ku ka ma keq se me ua ndalë 30 punëtorëve rrymën. Na e gënjejmë partnerin, i kemi thanë ta bijmë materialin nesër. Tash mos me mujt me ia dërgu. Shumë keq”, deklaroi Gashi për “Front Online”.

Kjo kategori, por edhe qytetarët, veç i kanë marrë masat për t`i bërë ballë reduktimeve.

Kërkesat për blerjen e gjeneratorëve, sipas kompanive që merren me shitjen e tyre, kanë kaluar pritshmëritë ditëve të fundit.

“Në ekstrem janë rrit kërkesat. Vetëm sot 300 thirrje. Nga 200 euro më i liri. Zakonisht deri në 15 mijë e deri në 35 mijë euro gjeneratorët industrialë”, u shpreh pronari i një kompanie që deshi të jetë anonim.

Ekonomisti Safet Gërxhaliu shtron disa pikëpyetje në rast se vazhdon mungesa e rrymës për komunitetin e biznesit.

“Brenga se si mund të jesh kualitativ në prodhim kur nuk ke rrymë elektrike. Si mund të jesh konkurrues kur nuk ke energji elektike. Kjo e dëshmon mjerimin në Kosovë”, tha ai për “Front Online”.

Qeveria ditë më parë mori vendim se do të mbulojë shpenzimet e importeve të energjisë elektrike.

E gjitha kjo që të mos ndalet furnizimi i rregullt e mos të ketë rritje të çmimit të energjisë në vend.