Më 26 korrik u vaksinuan vetëm 393 qytetarë me vaksinën anti-Covid-19 në krejt Kosovën. Kjo shifër mund të konsiderohet e madhe në raport me statistikat e datave: 18,19 dhe 21 të po të njëjtit muaj, në të cilat nuk figuron as edhe një person i vetëm i vaksinuar.
Ditët e “zbehta” si këto më të vaksinuar ia kanë prishur planin mujor, Ministrisë së Shëndetësisë, e cila parashihte vaksinim të 500 mijë qytetarëve brenda muajit. Tash kur kanë mbetur edhe 3 ditë deri te përfundimi i tij, gjatë muajit korrik, në krejt vendin, janë dhënë 206 mijë vaksina apo gati 300 mijë më pak sesa parashikonin zyrtarët shëndetësorë.
Profesori i gazetarisë në Universitetin e Prishtinës, Alban Zeneli, përmend dezinformimin si një nga arsyet e hezitimit të qytetarëve për imunizim.
“Sjellja e njerëzve bazohet në informatat që i marrim, rrjedhimisht nëse kanë marrë informata të rreme, informata të gabuara, sjellja e tyre është e gabuar. Në njerëzit që kanë konsumuar lajme të rreme se vaksinat përmbajnë çipa e forma të tjera, që nuk kanë qenë të vërteta, normalisht që hezitojnë më shumë me marrë vaksinën”, u shpreh Zeneli për “Front Online”.
Ky beson se dilemat rreth vaksinimit i kanë më të vogla ata që u informuan rreth vaksinës anti-Covid nga mediume të besueshme.
Problemin e njëjtë e identifikon edhe psikologu, Memi Gollopeni.
Sipas tij, informatat që “thithin” qytetarët ndikojnë pastaj në vendimet që ata marrin. Këtu hyn edhe çështja e vaksinimit anti-Covid 19.
“Për shkak të këtyre informatave që po marrin nga portalet e ndryshme, mediave të ndryshme, kinse kanë me pasë simptoma edhe pas marrjes së vaksinës e të tjera, janë mbledh shumë sende që njerëzit të hezitojnë me marrë vaksinën”, deklaroi ai për “Front Online”.
E që kjo të ndryshojë profesori Zeneli thotë se institutcionet si Ministria e Shëndetësisë dhe Instituti Kombëtar, duhet të zhvillojnë një fushatë të mirëfilltë të informimit, gjë që sipas tij, nuk e kanë bërë.
“Është dashtë të bëjnë kampanja të informimit të drejta në raport me atë se cfarë vaksina kanë në dispozicion qytetarët e Kosovës dhe si mund t`i marrin ato. Kemi disa fushta krejt demode dhe të zbehta të institucioneve përkatëse”, vlerësoi ai.
Të njëjtin mendim e ndan edhe sociologu, Bekim Selishta.
Ai tregon shembullin që duhet ndjekur institutcionet vendore në raport me vaksinimin.
“Në Evropë kanë fol për besim, për siguri, garancion, për të ardhmen sa i përket vaksinave. Te na shumë pak janë marrë në këtë drejtim. Do të duhej të merreshin”, theksoi ai për “Front Online”.
Fillimi i realizimit të Planit të Veprimit për Vaksinim të Qytetarëve në Masë me vaksinën kundër COVID-19 nisi më 15 qershor.
Që nga atëherë në total janë vaksinuar 388,073 qytetarë. Prej tyre, 124,226, me të dyja dozat. Disa me Pfizer/BioNTech dhe të tjerë me atë, AstraZeenca./FRONT ONLINE