Partia Demokratike e Kosovës ka ndërruar qëndrim dhe tani po kërkon që pas pandemisë me Covid-19, vendi të shkojë në zgjedhje. Anipse kjo parti në takimin që kishte me Presidentin, Hashim Thaçi, u deklarua se janë për formimin e një qeverie të re, tani kanë ndryshuar qëndrimin duke kërkuar zgjedhje të parakohshme.

Vendimi për pezullimin e dekretit të presidentit të vendit Hashim Thaçi, për mandatarin për krijimin e qeverisë së re, sipas Blerta Deliu-Kodra, ka qenë i duhur. Kjo pasi që ajo ka theksuar që PDK-ja i beson çdo vendimi që del nga kjo gjykatë.

LEXO EDHE: Deputetja e PDK-së: Qeveria “Kurti” për 100 ditë, 100 skandale

“PDK-ja ka besuar gjithmonë në këtë institucion dhe natyrisht ne edhe sot po e shfrytëzojë rastin që të kërkojë nga partitë politike që të tregojnë respekt ndaj vendimeve të këtij institucioni. Ne do ta presim vendimin final dhe çfarëdo që do të jetë ky vendim, si subjekt politik do ta respektojmë në përpikëri”, ka thënë ajo për “Front Online”.

Ndërsa për sa i përket zgjedhjeve të reja, ajo ka thënë se janë më se të gatshëm, kurdo që të krijohet situata e favorshme për mbajtjen e tyre.

“Jemi duke punuar shumë në terren. Ne jemi të gatshëm që sapo të krijohen kushtet të mendojmë për një qeveri legjitime dhe të kthehemi tek sovrani në mënyrë që edhe ai të përcaktojë udhëheqjen e këtij vendi”, ka thënë ndër të tjera ajo.