Shumica e shtatzënave që kanë lindur fëmijë në Klinikën e Gjinekologjisë janë kthyer në shtëpi në gjendje të mirë shëndetësore së bashku me foshnjat e tyre. Kështu thotë gjinekologu, Memli Morina. Ai thotë se në këtë klinikë situata aktualisht është nën kontroll

“Po jetojmë në një kohë kur të gjithë jemi të pasigurt, të gjithë kemi drojë dhe pasiguri me ata që na rrethojnë por dimensioni i frikës është akoma më i madh këtu në Klinikën e Gjinekologjisë pasi nuk bëhet fjalë vetëm për një person mirëpo edhe për një jetë të re. Për fat të mirë situata është nën kontroll dhe nuk është se kemi ndonjë alarmim lidhur me rrjedhën e punës në klinikën tonë”, tha Morina për RTK’në.

“Shumica dërmuese e grave shtatzëna të cilat kanë lindur por edhe ato të cilat kanë qenë në spital rrjedha e tyre ka qenë pozitive, pa ndonjë komplikim madhor. Ka pasur raste që kanë përfunduar me fatalitet por këto janë rrjedha që mund të ndodhin në secilën periudhë të historisë. Shumica dërmuese e grave të cilat kanë lindur kanë shkuar në shtëpi me bebe të shëndetshme dhe ato vetë me gjendje të përgjithshme shumë të mirë”, shpjegoi ai.

Sipas Morinës, në këtë klinikë nuk kanë pasur nevojë për staf shtesë për shkak të koordinimit të duhur të ekipit.

“Si ekip deri më tani kemi funksionuar në mënyrë perfektë”, tha Morina.