Dhimbja e kokës pasi të këni ngrënë akullore, nuk ka të bëjë aspak me akulloren. E gjitha është rezultat i ftohjes së qiellzës tuaj.

Dhimbje të tilla të kokës ndodhin sa herë që hani ose pini diçka të ftohtë shumë shpejt dhe zgjasin kryesisht rreth 20 sekonda. Ngrënia e ushqimit të ftohtë ngadalë, mund t’i japë kohë qiellzës suaj që të ftohet normalisht dhe të përshtatet me temperaturat e ulëta pa shkaktuar dhimbje koke.

Sipas klinikës Mayo, mekanizmi i saktë që çon në dhimbjet e kokës pasi të keni ngrënë akullore nuk dihet aktualisht, por besohet se dhimbja e kokës është një rast i dhimbjes së referuar.

Kur qiellz e gojës ftohet shumë shpejt, sinjali i dhimbjes që ndjehet në gojë kalon në nervin trigeminal, i cili më pas e kalon atë në tru ku përpunohet dhe përjetohet.

Nervi trigeminal ‘ndjen’ dhimbje nga e gjithë fytyra dhe balli, kështu që kur mbingarkohet, dhimbja nga goja juaj duket se vjen nga balli.

Dhimbjet e kokës nga akullorja mund të shmangen duke ngrënë ushqime të ftohta ngadalë, duke e lënë ushqimin e ftohtë të ngrohet përpara se ta hani atë, ose duke hedhur pak ushqim të ftohtë në gojë përpara se të konsumoni pjesën tjetër, në mënyrë që të ndihmoni qiellzën tuaj të përshtatet.

Nëse ndodhin, këto dhimbje koke mund të lehtësohen duke shtypur gjuhën tuaj të ngrohtë në qiellzën e gojës për ta ngrohur atë, ose duke pirë një pije të ngrohtë.

Marrë nga: Science Questions with Surprising Answers
Nga: Dr. Christopher S. Baird – profesor i Fizikës në West Texas A&M University.
Përkthyer nga: Shkendije Berisha /GazetaExpress/