Një 31-vjeçar ka humbur jetën në Tiranë. Policia njofton se i riu është gjetur i shtrirë në Rrugën e Kavajës, përballë qendrës shëndetësore të kësaj zone.
“Mbrëmjen e djeshme, rreth orës 20:00, në Rrugën e Kavajës, përballë qendrës shëndetësore, është gjetur i shtrirë në sheshpushimin e një pallati, shtetasi M. Rr., 31 vjeç, banues në rrugën ‘Myslym Keta’”, bën me dije policia.
Më tej Uniformat Blu sqarojnë se nga hetimet është zbuluar se 31-vjeçari ka rënë nga kati i pestë i një pallati, duke përfunduar në sheshpushimin e tij.
“Menjëherë me marrjen e njoftimit është formuar një grup i posaçëm hetimor i cili ka shkuar në vendngjarje dhe nga kryerja e veprimeve hetimore, dyshohet se 31-vjeçari ka rënë nga kati i pestë i pallatit”, sqarojnë autoritetet.
Pasi është konstatuar i shtrirë, ai është transportuar në spital, por si pasojë e dëmtimeve ka ndërruar jetë.
Ndërkohë, një grup i posaçëm hetimor po vazhdon punën për sqarimin e plotë të rrethanave të ngjarjes.
