Autoritetet australiane kanë dërguar qindra trupa në Sidnei për të ndihmuar në zbatimin e bllokimit, shkruan BBC. Ushtarët do t’i nënshtrohen trajnimit gjatë fundjavës, para se të fillojnë patrullimet e paarmatosura të hënën, transmeton FrontOnline.
Shumë pyesin nëse ndërhyrja ushtarake është e nevojshme. Bllokimi, i cili është në fuqi të paktën deri më 28 gusht, i ndalon njerëzit të largohen nga shtëpia e tyre, përveç në raste të veçanta.
Pavarësisht bllokimit pesë-javor, infektimi vazhdon të përhapet në Sidnei. Sot, janë raportuar 170 raste të reja. Ushtarët do të bashkohen me policinë në pikat e nxehta të virusit për të siguruar që njerëzit t’i përmbahen rregullave, të cilat përfshijnë një limit udhëtimi prej 10 km.
Shefi i Policisë së New South Wales David Elliot tha se ushtria do të ndihmonte sepse disa qytetarë të Sidneit mendojnë se rregullat nuk zbatohen për ta. Të dhënat nga shërbimet shëndetësore tregojnë se virusi transmetohet kryesisht përmes lëvizjeve të paligjshme.
Juristët australianë besojnë se përdorimi i ushtrisë në një demokraci liberale është shqetësues. Epidemia ka goditur rëndë punëtorët dhe periferitë e varfra. Kritikët thonë se ato zona tashmë janë përballur me masat e policisë dhe theksojnë se ato kufizime janë më të rrepta se në pjesën tjetër të Sidneit.
“Njerëzit tanë janë një nga kategoritë më të varfra demografike dhe ata ndihen të margjinalizuar”, tha Steve Christou, një nga udhëheqësit lokalë. Shkalla e vaksinimit në Australi – 17% e popullsisë së rritur – mbetet një nga më të ulëtat në mesin e vendeve të OECD./FrontOnline/