[wp-story]

Lajme

Aprovohet ndërtimi i 29 shtëpive për të kthyerit në pesë komuna

Aprovohet ndërtimi i 29 shtëpive për të kthyerit në pesë komuna
09:37 | 16 Shtator 2020

Ministria për Komunitete dhe Kthim ka njoftuar se do të ndërtohen 29 shtëpi të reja për të kthyerit në pesë komuna të Kosovës.

Ky vendim u mor në seancën e fundit elektronike të Komitetit Drejtues të projektit “Kthimi dhe Riintegrimi në Kosovë, Faza e Pestë (EU RRK-5)”.

“Përfaqësuesit e Zyrës së BE-së dhe Ministrisë për Komunitete dhe Kthim vendosën të ndërtojnë 29 shtëpi të reja për të kthyerit dhe PZHBV-të nga komunat Istog, Rahovec, Shtërpcë, Pejë dhe Graçanicë“, thuhet në njoftim.

Seanca elektronike u mbajt në prani të përfaqësuesve të UNHCR-it dhe Organizatës Ndërkombëtare për Migracionin (IOM), e cila po zbaton projektin.

“29 familje të zgjedhura të të kthyerve dhe personave të zhvendosur brenda vendit me gjithsej 136 anëtarë, përfshirë fëmijët e vegjël, do të përfitojnë drejtpërdrejt nga ndërtimi i shtëpive. Përveç shtëpive të reja, familjet më të rrezikuara të të kthyerve dhe personave të zhvendosur brenda vendit gjithashtu do të marrin burime financiare stimuluese për të filluar biznesin e tyre në mënyrë që të kenë burime të të ardhurave dhe kështu të bëhen të pavarura ekonomikisht. Ndërtimi i të gjitha 29 shtëpive të sapo aprovuara është planifikuar të përfundojë deri në fund të vitit“, thuhet në njoftimin për media.

Projekti i përmendur i BE-së RRK-5 po implementohet në 12 komuna të Kosovës, përkatësisht: Graçanicë, Fushë Kosovë, Gjakovë, Novobërdë, Obiliq, Rahovec, Prizren, Pejë, Istog, Kamenicë, Klinë dhe Shtërpce.

Auto Mita me një mundësi të mirë për bizneset – për çdo veturë të re, SERVISI FALAS deri në 100…

Të tjera