Disa zona të Britanisë së Madhe po raportojnë numra në rritje të të prekurve me koronavirus, ndaj qeveria po ndërhyn me masa më të rrepta për kontrollimin e situatës.
Rritja e rasteve të infektimit me koronavirus ka detyruar qeverinë britanike të ashpërsojë masat antikovid për të mbrojtur popullatën nga një valë e dytë epidemike.
Autoritetet njoftuan të enjten se duke nisur nga mesnata, do të ndalohen vizitat në banesa mes familjeve të ndryshme për 4 milionë banorët e rajonit të Anglisë Veriore.
Pabet, restorantet dhe bizneset e tjera do të lejohet të qëndrojnë hapur, por sërish rregulli kryesor do të jetë kufizimi i kontakteve mes personave që nuk i përkasin të njëjtës familje, pasi mendohet se shpërfillja e rregullave të distancimit social po ndihmon përhapjen e sëmundjes.
Britania e Madhe raporton aktualisht mbi 300 mijë veta të prekur nga virusi SARS-CoV-2 dhe më shumë se 46 mijë jetë të humbura.
I pyetur nëse ndihej i turpëruar që vendi ka bilancin më tragjik të pandemisë se çdo shtet tjetër i Europës, kryeministri Boris Xhonson tha se është pikërisht kujtimi i atyre viktimave që po e shtyn qeverinë të hedhë hapa më të kujdesshëm në betejën me koronavirusin.
“Kemi një shpërthim të virusit në disa vende europiane, por jemi në dijeni edhe me situatën në Shtetet e Bashkuara. Është absolutisht jetike që të ruajmë fokusin dhe disiplinën dhe të mos gënjejmë veten se kemi dalë nga rreziku. Duhet ta ndalim valën e dytë pasi pasojat në mjekësinë dhe ekonominë tonë do të ishin realisht të rënda.”
Një ditë më parë, në Mbretërinë e Bashkuar u diagnostikuan 846 persona të rinj me Covid-19 ndërsa 38 njerëz e humbën betejën me sëmundjen vdekjeprurëse.
Qeveria ka udhëzuar qytetarët e vet se pushimet jashtë shtetit këtë vit janë të pasigurta dhe do u duhet të mendojnë vetëkarantimin për 14 ditë sapo të kthehen.
Spanja, Italia dhe Gjermania janë tri vendet me më shumë bartës të koronavirusit në Europë pas Britanisë, ndërkohë që në nivel kontinenti virusi u ka marrë jetën mbi 200 mijë personave.
