Vendet anëtare të Organizatës Botërore të Shëndetësisë janë pajtuar për nisje të një hetimi të pavarur për përgjigjjen globale ndaj pandemisë së koronavirusit.

Kjo rezolutë, e miratuar pa kundërshtim nga 194 vendet anëtare, përgjatë një takimi vjetor, kësaj here në mënyrë virtuale në Gjenevë, po ashtu lejon që hetimet të zgjerohen edhe në rolin e vetë këtij trupi shëndetësor, pasi OBSH-ja është kritikuar se ka shpallur vonë emergjencën shëndetësore.

Ndërkohë, SHBA në veçanti ka kritikuar ashpër këtë përgjigjje. Bashkimi Evropian ka prezantuar rezolutën në emër të 100 kombeve.

Në këtë dokument bëhet thirrje për “vlerësim të pavarur dhe përmbajtësor” të përgjigjes ndërkombëtare.

Shefi i OBSH-së, Tedros Adhanom Ghebreyesus, tashmë është pajtuar për të rishikuar vendimet e kësaj agjencie për pandeminë.

Ai ka thënë se një vlerësim i pavarur mund të tregojë se nga cilat veprime duhet mësuar, dhe se secili rekomandim do të mund të zbatohet “në mundësinë e parë”.