Lëvizja Vetëvendosja ditë më parë ka ngritur mocionin e mosbesimit për rrëzimin e Qeverisë “Hoti”.

Deri më tani kjo parti ka arritur t’i mbledhë 31 nënshkrime, jo të mjaftueshme sa për ta dërguar mocionin në Kuvendin e Kosovës për ta votuar.

Lidhur me votimin e mocionit, nga partia e Behxhet Pacolli, ARK-ja për Front Online ka folur deputetja Mirlinda Sopi.

Ajo tha se lidhur me votimin e mocionit të  Lëvizjes Vetëvendosje do të vendosin nesër, pasi që lideri i kësaj partie nuk ndodhet në Kosovë.

“Z. Pacolli nuk është në Kosovë, nuk jemi dakorduar, seanca është nesër po besoj që pasdite do ta kemi një takim për të diskutuar për këtë çështje”, tha shkurt deputetja e kësaj partie për Front Online.

Ndërsa nga Partia Demokratike e Kosovës (PDK) kanë thënë se nuk do ta nënshkruajnë mocionin e Lëvizjes Vetëvendosje, por do ta votojnë atë kurdo që kjo parti e dërgon në Kuvend.

Por, deputeti I PDK-së, Bajrush Xhemajli, në një prononcim për Front Online, nuk e ka përjashtuar mundësinë e ngritjes së një mocioni ndaj Qeverisë “Hoti”, edhe nga kjo parti.