Kreu i koalicionit “Bardh e Zi”, Dritan Abazoviq, tha se URA është koalicioni i vetëm i qeverisë së re që ka mbrojtur hapur anëtarësimin e Malit të Zi në NATO dhe politika e së cilës ishte e orientuar pa dyshim drejt anëtarësimit të Malit të Zi në Bashkimin Evropian.

“Ne nuk do të lejojmë asnjë bixhoz me interesat kombëtare të Malit të Zi dhe kemi mbështetjen e fortë të partnerëve tanë ndërkombëtarë”, theksoi Abazoviq në një bisedë me “Danas”.

Ai tregon se sfidat në rrugën e reformimit të shërbimeve të sigurisë janë jashtëzakonisht të mëdha dhe komplekse, por nuk ka dyshim se kjo reformë është një parakusht kryesor për luftën më efikase kundër krimit dhe korrupsionit, e cila është një nga detyrat kryesore të qeverisë së re, transmeton Telegrafi.

“Është e qartë për të gjithë se shërbimet e sigurisë në regjime jodemokratike, të tilla, si ajo në Malin e Zi deri kohët e fundit, përdoren shumë më shpesh për të monitoruar disidentët politikë dhe kritikët e regjimit, sesa për të ruajtur sigurinë kombëtare dhe për të luftuar krimin. Është e nevojshme të ndryshojmë rrënjësisht, nëse duam që Mali i Zi të zbatojë vërtet reformat e nevojshme dhe së shpejti të bëhet një anëtar i plotë i Bashkimit Evropian (BE)”, theksoi politikani shqiptar.

Ai është i bindur se vala e ndryshimit e sjellë nga politika e URA-s po përhapet brenda rajonit.

“Rajoni ynë meriton dhe mund të bëjë shumë më tepër, veçanërisht në drejtim të demokratizimit të institucioneve dhe kapërcimit të ndarjeve të shumta shoqërore. Përvoja e Malit të Zi është shembulli më i mirë se askush nuk është i pathyeshëm ose i paprekshëm dhe se ndryshimet janë të mundshme, edhe kur pak besojnë në to”, tha Abazoviq.