Shkencëtarët polakë besojnë se një përbërës i gjetur në patate mund të jetë efektiv në luftimin e kancerit. Ata besojnë se glikozoalkaloidet që gjenden në perime si patatet, domatet dhe patëllxhanët mund të ndihmojnë, shkruan Daily Mail.
Bazuar në studimet e kryera, studiuesit arrijnë në përfundimin se glikozoalkaloidet, kimikate natyrale që gjenden në patate, mund të ndikojnë në kimikatet potencialisht kancerogjene.
Magdalena Winkiel nga Universiteti Adam Mickiewicz në Poznań u fokusua në pesë glikoalkaloidë që ajo beson se mund të përdoren për zhvillimin e ilaçeve në të ardhmen. Megjithatë, ende nuk është kryer asnjë hulumtim se si kimikatet mund të luftojnë kancerin në qelizat njerëzore.
“Shkencëtarët në mbarë botën janë ende në kërkim të ilaçeve që do të jenë vdekjeprurëse për qelizat e kancerit, por në të njëjtën kohë të sigurta për qelizat e shëndetshme. Kjo është arsyeja pse mund të ia vlen t’i kthehemi bimëve mjekësore”, beson Winkiel, duke shtuar se nëse kimikatet “nuk mund të përsërisin ilaçet kundër kancerit që përdoren sot, ndoshta terapia e kombinuar do të rrisë efektivitetin e trajtimit”.
Bimët janë përdorur për të luftuar kancerin për dekada, por nuk ka asnjë studim që thotë se ngrënia e tyre do të vrasë qelizat e kancerit, edhe nëse një dietë e shëndetshme mund të ndihmojë në parandalimin e tumoreve.
Dr Charles Evans, kreu i informacionit kërkimor në Cancer Research UK, pajtohet, duke thënë se “bimët prodhojnë një gamë të madhe dhe të larmishme kimikatesh interesante dhe të nënstudiuara.”
“Është e rëndësishme të theksohet se shumë nga këto komponime nuk do të jenë të përshtatshme si barna, ose sepse nuk janë mjaftueshëm efektivë ose sepse nuk janë mjaftueshëm të sigurt për t’u përdorur. Është jetike që ne të eksplorojmë të gjitha mënyrat e mundshme për të zbuluar trajtime të reja, prandaj është thelbësore që studiuesit t’i hetojnë këto kimikate për të parë nëse ato kanë potencialin për t’u bërë ilaçe të reja”, përfundon Dr. Evans./FrontOnline/
