Prej vitit të ardhshëm listës së zyrtarëve publik që do ta deklarojnë pasurinë i shtohen mjekët dhe profesorët universitarë. Kështu ka vendosur ditë më parë Qeveria e Kosovës, mirëpo kjo iniciativë e ekzekutivit për t’u bërë e plotfuqishme pritet të miratohet edhe në Kuvendin e Kosovës.

Ky vendim i Qeverisë “Kurti 2” është komentuar si shantazh ndaj sindikalistëve të shëndetësisë dhe arsimit, të cilët po kërkojnë rritje të pagave nëpërmjet Ligjit të ri.

Është thënë së fundi se nëse mjekët dhe profesorët obligohen ta deklarojnë pasurinë në Agjencinë Kundër Korrupsionit, pse mos të obligohen edhe punëtorët e Administratës Tatimore të Kosovës dhe të Doganave të Kosovës, institucione këto që menaxhojnë me të hyra vjetore prej rreth 2 miliardë euro, raporton Front Online.

Megjithatë nga Lëvizja “Fol”, e cila e monitoron punën e Agjencisë Kundër Korrupsionit, këtë po e shohin si të pa nevojshme.

Erblin Hoxha nga Lëvizja Fol ka thënë për Front Online se AKK-ja nuk ka kapacitete që të mbikëqyr më shumë zyrtarë që e deklarojë pasurinë.

“Jo vetëm pse s’është e rëndësishme qe ata te deklarojnë, por sepse e kemi te pamundur ta mbikëqyrim procesin. Momentalisht AKK-ja nuk ka mundësi me monitoru me shume se 20% te aplikantëve. Ne kemi propozuar që as punëtoret e Doganës e as te ATK-se nuk do duheshin te jene pjese e deklarimit te pasurisë”, ka thënë ai për Front Online.

Sipas tij, kjo do ta vështirësoj edhe më tej punën e kësaj Agjencie me këto kapacitete ekzistuese që i ka.

“Tash duke  e rritur numrin e deklaruesve, ju vështirësohet puna AKK-së në monitorimin e procesit”, ka thënë Hoxha.

/Front Online/