Gjykata Kushtetuese e ka shpallur sot të pavlefshëm Ligjin për Paga në sektorin Publik, pas kërkesës së Avokatit të Popullit dhe pas ankesës së disa sindikatave, lidhur me vlersueshmërinë e disa neneve të këtij ligji, raporton Front Online.

Këtë vendim për Front Online e ka komentuar edhe nënkryetari i Sindikatës së Policisë së Kosovës, Shaban Tasholli.

Ai ka thënë që pas takimit që do të kenë me sindikatat e tjera, do të vendosin edhe për hapat sindikal që do të marrin duke përfshirë këtu edhe protestat.

“Ne kemi treguar edhe më herët që mbi 4 sindikata kemi një bashkëpunim dhe ne sot do të takohemi dhe do të dalim me një komunikatë të përbashkët. Policia ka të drejtë të protestojë por jo të hyjë në grevë. Ne sindikatat do të takohemi dhe do të vendosim për hapat e mëtutjeshëm bashkërisht”, ka thënë tutje ai.

Gjykata ka thënë se ka ardhur në përfundim se ligji i kontestuar nga Avokati i Popullit, nuk kishte harmonizuar pagat në nivel të të gjithë sektorëve. Aty ka theksuar se ka pasur përjashtime arbitrare dhe të paarsyetuara për disa institucione, përfshirë: Forcën e Sigurisë së Kosovës, Agjencinë Kosovare të Inteligjencës, Agjencinë Kosovare të Privatizimit, Bankën Qendrore të Kosovës, dhe vet Kuvendin./Front Online