Ministrja e Drejtësisë Maja Popoviq, gjatë një takimi me Sekretarin e Përgjithshëm të Konferencës së Hagës për të Drejtën Ndërkombëtare Private, Cristof Bernasconi, ka kërkuar që të refuzohet kërkesa e Kosovës për anëtarësim në disa konventa dhe kërkesa për anëtarësim në atë organizatë, duke theksuar se “është jo shtet, sipas të drejtës ndërkombëtare, por territor brenda Republikës së Serbisë”.

Ajo me atë rast theksoi se për Serbinë është e papranueshme që Kosova të anëtarësohet në disa konventa të Konferencës së Hagës, të cilat janë të hapura për të gjitha vendet, dhe se organizata ndërkombëtare pritet të veprojë në përputhje me Kartën e Kombeve të Bashkuara. si dhe të respektohet detyrimi ligjor i rezolutës 1244 të Këshillit të Sigurimit të OKB-së, thuhet në deklaratën e Ministrisë.

Në takim u diskutua edhe mënyrat për përmirësimin e bashkëpunimit ndërmjet Serbisë dhe Konferencës së Hagës, si organizata më e rëndësishme ndërkombëtare që merret me unifikimin e së drejtës ndërkombëtare private.

Gjithashtu u theksua se Serbia merr pjesë aktive në punën e Asamblesë Plenare dhe organeve të tjera të përhershme të Konferencës së Hagës./FrontOnline/