Ambasadori i BE-së në Kosovë, Tomas Szunyog, ka reaguar pas vendimit të Qeverisë së Kosovës për uljen e pagave për gjykatësit dhe prokurorët.

Në një postim në Twitter, ai tha se “jam befasuar” nga ky vendim.

“Jam i befasuar nga vendimi i Qeverisë së Kosovës për t’i ulur dukshëm pagat e gjykatësve dhe prokurorëve”, tha Szunyog.

Ai thotë se “financimi adekuat dhe pavarësia e institucioneve gjyqësore janë gurë themele të sistemit të sundimit të ligjit dhe kërkesa themelore të procesit integrues në BE”.

Qeveria, në mbledhjen e djeshme, e ka proceduar për miratim në Kuvend Projektligjin për Paga, por paraprakisht ua ka ulur pagat gjyqtarëve e prokurorëve.

Ekzekutivi mori këtë vendim, duke shfuqizuar atë të marrë në mandatin e parë të Qeverisë Kurti.

Atëkohë e pati shfuqizuar vendimin e Qeverisë Haradinaj që rriste për 100 për qind pagat e të emëruarve politikë dhe që kishte efekt edhe te dyfishimi i pagave të gjyqtarëve dhe prokurorëve. Vendimi për uljen e pagave të stafit politik nuk kishte efekt në sistemin e drejtësisë./Front Online