Një ish-ushtar britanik është vrarë teksa po luftonte në krahun e ushtrisë ukrainase.

Lajmin e ka konfirmuar familja e tij, raporton BBC, transmeton Express.

Jordan Gatley i cili u largua nga ushtria britanike në mars dhe udhëtoi për në Ukrainë, u përshkrua si “një hero” nga babai i tij.

Ai vdiq në betejën për qytetin lindor të Severodonetsk, i cili ka pasur luftime intensive ditët e fundit.

Ministria e Jashtme e Britanisë së Madhe ka thënë se “po mbështet familjen e një britaniku që ka vdekur në Ukrainë”.

Babai i Gatley shkroi në një postim në Facebook se djali i tij kishte ndihmuar në trajnimin e forcave lokale. Ai shtoi se Jordan u qëllua për vdekje në vijën e frontit ndërsa mbronte qytetin dhe ata u informuan për vdekjen e tij të premten./Front Online