Varianti i ri i virusit Covid-19 i quajtur “Omicron” ka nisur të përhapet në shpejtësi të madhe në shumë vende të botës.

Së fundi, edhe Greqia është prekur nga ky variant.

E kurimi i këtij varianti po del të jetë më i vështirë.

Institucionet shëndetësore po bëjnë thirrje që qytetarët të vaksinohen në mënyrë që të mos ketë valë të re të infeksionit.

Edhe infektologët po japin alarmin se duhet të ketë respektim strikt të masave, në mënyrë që të mos ketë valë të re në janar të këtij viti.

Infektologu Hamdi Ramadani, në një prononcim për Front Online, thotë se me ardhjen e mërgimtarëve për festat e fundvitit, mund të kemi valë të re të Covidit, nëse nuk respektohen masat.

“Me ardhjen e  mërgimtarëve për festat e fund vitit duhet me pas parasysh edhe respektimin e masave strikte ashtu si janë të cekura në vendimin e Qeverisë pra të zbatueshme me përpikëri. Nëse kjo bëhet, atëherë në vend mund të kaloj mirë dhe mundësia e shpërthimit të një vale të re është e vogël. Nëse këto masa nuk respektohet atëherë gjasat që të shpërthej vala e re e virusit janë të mëdha” , tha ai për Front Online.

Masa për t’u mbrojtur nga ky virus, ditë më parë ka marrë edhe Qeveria e Kosovës.

Infektologu Hamdi Ramadani, për Front Online, tha se masat të cilat kanë hyrë në fuqi janë të drejta për ta parandaluar përhapjen e virusit dhe se ato duhet që të respektohen me përpikmëri.

“Ashtu si thatë masat e miratuara nga Qeveria e Kosovës jenë në përputhje edhe me rrethanat dhe situatën epidemiologjike në vend, rajon, Evropë, por dhe në botë që janë të bazuara dhe të drejta”, tha ai.

Infektologu Ramadani: Duhet të filloj marrja e dozës së tretë të vaksinës anti/Covid

Infektologu Ramadani tha se edhe imunizimi i qytetarëve duke u vaksinuar e parandalon përhapjen e virusit.

Por ai ka edhe një apel.

Thotë se duhet të fillojë dhënia e dozës së tretë të vaksinës.

“Vaksinimi duhet të ngritët më shumë duhet të lejohet sa me parë dhe doza e tretë e dhënies së vaksinës dhe sa me herët të bëhet kjo që më mirë do të ishte kur shumë vende kanë lejuar edhe dozën e tretë”, tha ai për Front Online.

 Infektologu Ramadani: Shkencëtarët po hulumtojnë mundësinë e modifikimit të vaksinave anti-Covid

Infektologu Ramadani ka thënë se duhet parë e studiuar variantin “Omicron” për ta detektuar mënyrën e përhapjes së tij.

Ai thotë se tani kompanitë farmaceutike e shkencëtarët janë duke hulumtuar mundësinë e modifikimit të vaksinave për shkak të dyshimit të mundshëm të vaksinave të rezistencës ndaj vaksinave.

“Tani edhe kompanitë farmaceutike, shkencëtarët e kompanive gjigante si: Pfizer, Moderna, Astra Zeneca, janë duke hulumtuar një mundësi të modifikimit të vaksinave anti-covid për shkak të një dyshimi të mundshëm të rezistencës ndaj vaksinave aktuale”, ka thënë tutje ai për Front Online.