Mbi 215 milionë euro mallra ka importuar Kosova nga Shqipëria gjatë këtij viti.

Përllogaritja është bërë nga janari e deri në fund të tetorit. Nuk është përfshirë edhe muaji nëntor, meqë statistikat për të nuk figurojnë akoma te Agjencia e Statistikave të Kosovës.

Muaji më i bereqetshëm për Shqipërinë ka qenë tetori. Kosova bleu nga ajo gjithsej 28.9 milionë euro mallra, shkruan “Front Online”. 

E më i zbehti ishte janari. Kosova mori nga Shqipëria produkte vetëm në vlerë të 7.3 milionë eurove.

Importi i Kosovës nga Shqipëria për muajt e tjerë është si vijon:

Shtator – 26.1 milionë euro.
Gusht – 23.1 milionë euro.
Korrik – 24 milionë euro.
Qershor – 25.6 milionë euro.
Maj – 27 milionë euro.
Prill – 22.7 milionë euro.
Mars – 21.2 milionë euro.
Shkurt – 11.2 milionë euro.

Eksporti i Kosovës në Shqipëri, mbi 90 milionë euro

Në anën tjetër, eksporti i Kosovës në Shqipëri është mbi 92 milionë euro.

Më së shumti mallra, e para dërgoi tek e dyta në muajin korrik – 11 milionë, shkruan “Front Online”. 

E më së paku në shkurt, 6.5 sosh.

Eksporti i Kosovës me Shqipërinë sa i përket muajve të tjerë:

Tetor – 8.8 milionë euro.
Shtator – 9.8 milionë euro.
Gusht – 9.9 milionë euro.
Qershor – 9.8 milionë euro.
Maj – 9.4 milionë euro.
Prill – 9.5 milionë euro.
Mars – 9.9 milionë euro.
janar – 7.5 milionë euro.

Krahasimi Kosovë – Shqipëri – Serbi

Kosova importon më shumë nga Serbia mallra sesa nga Shqipëria.

Për vitin 2021, statistikat thonë se Kosova importoi afër 250 milionë euro produkte nga e para dhe mbi 215 milionë nga e dyta.

Ndryshe qëndron situata tek eksportet, shkruan “Front Online”. 

Kosova ka çuar gjatë 10 muajve të këtij viti gati trefish më shumë produkte në Shqipëri sesa në Serbi.

Mbi 90 milionë tek e para dhe mbi 30 sosh tek e dyta.

Ekonomisti, Mustafë Kadriaj e shpjegon këtë situatë ekonomike.

“E para është politika dekonstruktive e Serbisë që e sheh Kosovën vetëm si vend ku mund të eksportojë, por jo edhe të importojë prej saj. Tregu serb nuk ka nevojë për produkte të Kosovës, për shkak se pjesën e konsumit ai e plotëson vetë. Me Shqipërinë s`ka barriera që i vihen eksportit të Kosovës”, u shpreh Kadriaj për “Front Online”. 

Kosova ka importuar 3.8 miliardë mallra nga Serbia dhe veç 1.8 miliardë euro nga Shqipëria.

Bazuar në të dhënat e Agjencisë së Statistikave të Kosovës (ASK) kjo shumë e përgjithshme e importeve nga dy vendet fqinje është nga viti 2008, kur shteti e ka shpallur pavarësinë e deri më tani.