Të drejtën e tërheqjes së 10 % nga TRUSTI e shfrytëzuan 421 mijë e 363 kontribuues.

Shuma e përgjithshme e kursimeve të tyre, që këta nxorën nga ky insitutcion, brenda 6 mujorit të parë të këtij viti kap vlerën e plot 198 milionë eurove, shkruan “Front Online”.

Kështu njoftuan të enjten nga Trusti.

E mjetet që u lëshuan në treg para vaktit për të lehtësuar gjendjen ekonomike të qytetarëve dhe rimëkëmbjen e gjithmbarshme ekonomike, shkaku i situatës me pandeminë, sipas ekonomistit Musa Limani e arritën efektin e tyre, deri diku.

“Normalisht se ka pasë efekt se me rritjen e konsumit atëherë vjen edhe deri të rritja e prodhimit për arsye se konsumi ndikon rritjen e ofertës agregate. Ka pasë edhe efekte ekonomike, por jo kumedit sa”, theksoi ai për “Front Online”.

Ndikimin që ato patën në ekonomi e evidenton edhe ekonomisti tjetër, Mustafë Kadriaj.

Megjithatë, ky thekson se shuma prej afro 200 milionë nuk është se pati ndonjë efekt të madh në rimëkëmbjen ekonomike të vendit.

“Rrjedhimisht 198 milionë eurot e tërhequra nga qytetarët kanë rritur fuqinë e konsumit. Si rezultat është rritur qarkullimi i bizneseve kryesisht tregtare, gjë që më pas ka rezultuar në rritjen e tatimit dhe taksave në arkën e shtetit. Megjithatë, nuk mund të quhet rimëkëmbje ekonomike një vlerë prej 198 milionë euro”, u shpreh ai për “Front Online”.

Rimbursimi i mjeteve për gjithë qytetarët që tërhoqën mjetet e tyre nga Fondi i Kursimeve Pensionale parashihet të nisë në vitin 2023.

Qeveria e Kosovës do t’i kompensojë vetëm ata që kanë pasur në këtë fond nën 10 mijë euro. Të tjerët mbi këtë shumë, jo.