Kosova dhe Serbia që nga viti 2011 po dialogojnë për të arritur tek një marrëveshje e pranueshme nga të dy palët që parasheh normalizimin e marrëdhënieve ndërmjet dy shteteve.

Por, pavarësisht takimeve në Bruksel, palët nuk po bien në ujdi për të arritur tek marrëveshja finale, raporton FrontOnline.

Një gjë e tillë është bërë e ditur edhe të mërkuren pas takimit që ndërmjetësuesi Miroslav Lajçak, kishte në Bruksel me kryenegociatorët Besnik Bislimi dhe Petar Petkoviq.

Lajçak pas takimit ka thënë se ka ende shumë punë për t’u bërë.

E, gjatë ditës së djeshme në media është raportuar që takimi i radhës mes kryeministrit të Kosovës, Albin Kurti dhe presidentit serb, Aleksandër Vuçiq do të ndodhë në javën e tretë të korrikut.

Por, një gjë të tillë nuk e ka konfirmuar zëdhënësi i BE-së, Peter Stano.

“Ne e ftojmë takimin e ardhshëm për dialogun dhe e përcaktojmë agjendën e tij atëherë kur është koha e përshtatshme”, ka thënë Stano, për FrontOnline.

Ndërsa lidhur me atë se a do të ketë marrëveshje finale në mes Kosovës dhe Serbisë këtë vit, për FrontOnline ka folur njohësi i çështjeve ndërkombëtare, Afrim Hoti.

“Mendoj që në kushte normale jemi para një situate që është e pritshme sepse definitivisht rrethanat në të tria vendet përfshirë këtu edhe Bashkimin Evropian janë shumë favorizuese dhe të tria lidershipet kanë, pra Kosova, Serbia dhe Shtetet e Bashkuara të Amerikës kanë të gjithë legjitimitetin për ta adresuar përfundimisht këtë çështje dhe nëse ekziston vullneti politik në veçanti në Beograd dhe në Prishtinë, mendoj që viti i ri do ta gjejë Kosovën me marrëveshje”, ka deklaruar Hoti, për FrontOnline.

Ndërsa, ka pohuar se Serbia do të ketë përsëri kërkesa ndaj Kosovës kur bëhet fjalë për njohje e sidomos për çështjen e Asociacionit.

“Mbi këtë bazë besoj që Serbia do të provojë edhe më tutje që të shtyjë këtë logjikë ose këtë diskurs në veçanti për themelimin e Asociacionit me kompetenca ekzekutive sepse rruga e Serbisë ka BE-ja domosdoshmërish nënkupton edhe ndryshimin e Kushtetutës përfshirë këtu edhe preambulën…Mendoj se është fondamentale që të aludohet, respektivisht të ngulet këmbë në këtë çështje sepse çfarë do konstruksioni politik dhe juridik me kompetenca ekzekutive do ta minonte sistemin dhe rendin juridik në Kosovë”, është shprehur Hoti.

Por, ai ka një sugjerim për Qeverinë, në mënyrë që Serbia ta njohë Kosovën.

Thotë se nuk duhet të flitet për marrëveshje pa ndodhur njohja.

“Unë nuk mendoj se duhet të ndodhë e para, pa ndodhur e dyta, pra sipas mendimit tim logjika që duhet të përshkoj procesin e dialogut tash e tutje do të duhej të reflektohej mbi atë ose të zgjidhet pra të pranohet tërësisht një pako e normalizimit të raportove ose asnjë nga ato marrëveshje”, ka shtuar ai.

Sipas tij, pa njohje të ndërsjellë nuk mund të ketë komunikim normal ndërshtetëror./FrontOnline