Trajnerët Armend Dallku dhe Nazmi Rama e kanë komentuar ndeshjen e sotme mes Istogut dhe Dukagjinit.

Në ndeshjen e parë gjysmëfinale të Kupës së Kosovës, Dukagjini mposhti Istogun si mysafir me rezultat 1:2, shkruan FrontOnline.

Pas ndeshjes, Dallku u shpreh i lumtur me fitoren e sotme.

“Në radhë të parë dua që t’i përgëzoj të dy ekipet për luftën e treguar në këto kushte tejet të rëndësishme për lojë”, ka thënë Dallku në “Art Sport”.

“Jemi të kënaqur për fitoren, por asgjë nuk ka përfunduar, pasi që kemi edhe një ndeshje të radhës për të arritur në finale. Tash do të futem në dhomat e zhveshjes dhe do t’ua bëj e dije këtë gjë futbollistëve”, tregoi ai.

“E kam thënë edhe para ndeshjes që nuk nuk preferoj ndonjë skuadër, pasi që duhet së pari ne ta kryejmë punën tonë, pastaj të mendojmë për kundërshtarët”, shtoi trajneri vushtrrias.

Ndërkaq, Rama tregon se çfarë iu ka thënë futbollistëve të tij para ndeshjes.

“Ne jemi skuadër që luajmë futboll të bukur dhe në këtë terren ishte thuajse e pamundur. U kam thënë futbollistëve që ajo skuadër që do gaboj më pak dhe do ketë më tepër fat do ta fitojë ndeshjen dhe ashtu ndodhi”, deklaroi fillimisht Rama.

“Sikur kushtet atmosferike të ishin më ndryshe dhe gjendja e terrenit do ishte më e mirë ju garantoj që edhe skuadra jonë do ishte një tjetër ekip. Ne do të shkojmë në fundjavë për të luajtur me Dukagjinin dhe do të shfaqim ndeshje krejtësisht tjetër. Po ashtu do të luftojmë edhe në ndeshjen kthyese për ta përmbysur këtë rezultat”, përfundoi Rama./FrontOnline/